Malpica - Barizo
Trátase dunha etapa na que se combina o carácter natural dunha costa acantilada co aproveitamento rural e pesqueiro dos recursos do territorio.
Comeza na vila de Malpica que representa a identidade litoral dos asentamentos estratéxicos sobre un istmo de unión entre un promontorio mariño (neste caso o monte da Atalaia) e a fronte costeira. A dobre orientación do istmo deu lugar aos usos portuarios e de praia que se desenvolven a ambos os lados, onde a morfoloxía urbana se adapta ás condicións topográficas. A subida ao monte Atalaia garante unha panorámica de gran calidade visual.
A senda avanza entre mato e formacións de repoboación, alternando os perfís acantilados coas enseadas e as súas atractivas praias, como a praia de Seaia, tras a cal se bordea unha das vertentes do fito paisaxístico deste tramo costeiro do monte de Santo Adrián, desde o que se poden ollar as Illas Sisargas; e a praia de Beo, fronte costeira do val do río do mesmo nome onde se asentou o núcleo de identidade litoral de Beo.
A continuación, o percorrido atravesa o val do río Barizo cuxo litoral acolle o areal do mesmo nome aproveitando o entrante natural da súa enseada. No núcleo de Barizo convive a tradición da aldea galega coa modernidade, mantendo os valores propios dos núcleos tradicionais con casas de pedra e congostras que atravesan o tecido urbano sinalizado con cruceiros de pedra. O grande atractivo turístico deste enclave motiva que os novos asentamentos se sitúen preto da praia.
Desde aquí o trazado contempla a subida ao grandes cantís do monte de Nariga para chegar ao faro do mesmo nome. Trátase dun percorrido de ida e volta ata Barizo entre o mato costeiro e a inmensidade dos xeradores eólicos.